REVISTA CULTURAL DE LA ASOCIACIÓN "AMIGOS DEL PAISAJE DE VILLAVICIOSA"
PUEBLO EJEMPLAR DE ASTURIAS 1991
Año XII - Nº 28 - Septiembre 1996

Album familiar

Trayemos güey equí dos semeyes de la quintana nomada La Biesca, na parroquia de Bedriñana. Les instantánees, feches de xuru na primera década d’esti sieglu o na cabera del pasáu, enséñenmos la casa, cuadra, horru y antoxana onde’l paisano presume de la so menguada reciella. Quiciabes estes semeyes fueren feches por o p’americanos parientes de l’amu la casería.

Arriba, na casa, baxo’l correor vemos l’estragal y el cuartín d’afuera. Tamién atopamos el vieyu vezu, agora escaecíu, de facer cuchu delantre la cuadra, espardiendo l’estru pa dir pisándolo. Les teyes amontonaes xunto la milana la cuadra paecen glayar, guapamente, l’aniciu d’obres: pocu dempués fabricaren ellí un llagar.

Na vista pequeña, so l’horru vestíu con riestres de panoyes, asomen los preseos xunto una corripuca. Cerque los pegoyos, unos paxos falen del trabayu na güerta. Mientres, un vecín, enriba d’un burru, llega gayasperu a la quintana col verdascu na mano.

Gracies a Alfonso Barro por apurrimos estes curioses fotografíes d’un requexu d’anantes, y qu’anguañu por disgracia, ye cada vegada más raro atopar na aldea. Y eso que la calidá de vida amesta enforma col respetu a lo heredao de los nuesos mayores.

inicio	índice	asociación	cultura	documentación	naturaleza	paisaje	personajes	reportaje

CUBERA
Asociación "Amigos del Paisaje de Villaviciosa"