Zamora Vicente esbilló delles de les esperiencies personales de la so llarga esistencia xuntu a María Josefa, y el vacíu dexáu per la muerte de aquella pequeña muyer de poques palabres y enfotos grandes. Y terminó´l so parzamicu llamentando´l "fondu silenciu que sucedió a la so voz".

"Una vez morrió una muyer en Piedrafita. El viudu alcontraba toes les coses feches cuando volvía pa casa pela tardiquina...", asina entama ún de los cuentos recoyíos per María Josefa Canellada de boca d´una muyer de 84 años de Madiéu, y incluyíu na so tesis, publicada en 1944 baxu´l títulu "El bable de Cabranes"; ún de los cuentos que-y prestaben a ella, una historia d´encantos y coses estraordinaries de les que pasaben -y tóvia pasen, de xuru- cabu los regatos y les juentes, nos potriles y les cases, nes mates de carbayos y castañales que queden en pie peryuri en cualisquier monte o pueblín de Cabranes o Villaviciosa.

Apocayá, L´Academia de la Llingua tuvo la perguapa idea de reeditar la gran obra de María Josefa Canellada, mediu sieglu dempués de que viera la lluz, y a un añu de la so desaparición. L´entamu abre una oportunidá a les munches persones que naguaben per lleer el magníficu compendiu del saber, el vivir, el trabayar, y el sintir, de la xente perteneciente a un pequeñu y montiegu conceyu que regune en sí mesmu les tradiciones más representatives y los elementos culturales más significativos d´Asturies.

"El bable de Cabranes" fúi la primer tesis doctoral que se fexo n´Expaña sobre l´asturianu, y sirvió de base y sofitu pa munchos trabayos que vinieren darréu, ayudando a conocer meyor el dominiu llingüísticu asturianu. A María Josefa nun-y dió tiempu, como tenía proyectao, enxaretar más datos a la so tesi, arriqueciéndola; la gadaña de la muerte nun-y dió permisu pa ello, desgraciadamente.

La filóloga empondera la bayura con que cuenta la llingua de los suyos, y como exemplu apunta: "Al ‘dar llamaradas’ se le dice en Cabranes llampurdiar, y llampardiar, y los nombres de la llamarada son en todo el concejo: llapada, llaparada, llampurdión, llampurdiazu, llampardiada, llampurdiada, todos con el mismo significado".

Nes cerca de 400 páxines del llibru, esbíllase tola bayura de la llingua popular, esa llingua que fúi -que va- pocu a pocu, adulces, amorrentando, espuliendo de les nuestres manes, que nos cai de la boca como la baba a los vieyos con párkinson, incapaces de poner en funcionamientu los músculos de la cara.

La obra de María Josefa ye un recordatoriu de lo que los asturianos somos y falamos, o quiciabes de lo que podemos ser si nun esbardiamos la nuestra bayura, el patrimoniu de les xeneraciones que nos precedieren.

Gracies a ella sabemos de la a proteíca, del xenitivu partitivu, del neutru diferencial del asturianu, de la palatalización o de la forma d´entonación nuestra. Canellada fexo que nos reconociéremos nun vocabulariu y nuna forma d´entender el mundu que nos arrodiaba pero nun la reconocíamos.

El llibru fúi presentáu al empienzu del verañu en L´Infiestu, el pueblu que la viera ñacer en 1913, pel viudu de la nuestra filóloga, Alonso Zamora, secretariu perpetu de l´Academia de la Lengua Española. El llugar escoyíu fúi´l salón de plenos del Ayuntamientu de Piloña, y al emotivu actu asistieren, ente otres personalidaes polítiques y académiques, los alcaldes piloñés y naveto, Juan Priede y Xulián Fernández, el presidente de la l´Academia de la Llingua, Xosé Lluis García Arias, y otros profesores y académicos como Ana Cano y Roberto González Quevedo. Tamién tuvieren presentes fíos y demás familia de Canellada.